ค่าวฮ่ำเรื่องผี
มิตสาติถี อันผีนั้นเล๊า ข้าจั๊กเล่าเก๊า ตลอดเถิงป๋าย
ขอเจิญปี้น้อง มิตรแก้วสหาย บ่ว่าญิงจาย เหมือนกั๋นจุผู้
คนเฒ่าเก่าหลัง
เปิ้นจั้งเล่าอู้ ว่าผีมีจริง เน่อไท้
ผีก๊ะผีสือ ผีปงป่าไม้ ตังผีเสื้อห้วย ผีดอย
ผีเผดผียักษ์ ตังผีของขอย ตังผีต๋ามอย ผีป๊กกะโหล้ง
ผีฮ่าผีโหง ชอบอยู่ต๋ามโหม้ง ตังผีโพงดง อี่ค้อย
ตังผีต๋องเหลือง พุมพรายใหญ่น้อย เรื่องราวเกิดขึ้น เป๋นมา
ยังมีไตเงี้ยว คนหนึ่งนั้นหนา ได้เดินมรรคกา เข้าดงป่ากว้าง
มันไปหันผี อยู่กิ๋นเสพสร้าง ตี้กล๋างดงดอย ตี้นั้น
มันก่อเจี๋ยรจ๋า กั๊บผีถี่ชั้น ไปต๋ามเขตขั้น ลวงราย
มันก่อยกย้าย เอาผีมาขาย หื้อฝูงญิงจาย ซื้อไว้เฝ้าบ้าน
หมู่เฮาตังหลาย บ่ได้ต่อต้าน ปากั๋นฮับเอา ซื้อไว้
เอาเฝ้าข้าวของ บ้านจองเครื่องไจ๊ แป๋งตี้อยู่หื้อ เปียงปอ
แป๋งตี้อยู่พัก แป๋งหิ้งแป๋งหอ แป๋งมอกก๋ำปอ พ่องใหญ่พ่องหน้อย
พ่องก่อแป๋งหลวง มีพวงดอกสร้อย มีพวงมาลัย จ่องก๊อง
เลี้ยงดูสู่สาย วงใยปี้น้อง มีจิ้นไก่ต้ม หมูงัว
อาหารพร่ำพร้อม จ้วยกั๋นหนาหนัว ป้อครัวแม่ครัว ลูกแป้งลูกเหล้า
แต่งตั้งกั๋นเป๋น ตี้นั่งตั้งเข้า หื้อผีปาตี อวบฟัก
ใส่จื่อว่าผี ปู่ย่าอารักษ์ มีกั๋นคู่บ้าน จานจอง
กันแป๋งหอแล้ว ปากั๋นฉลอง ไจ๊เงินไจ๊ทอง จ่ายกั๋นบ่หน้อย
ม้าขี่ตังหลาย เจิญมาเป๋นถ้อย มาเต้นรำวง แอ่นฟ้อน
เครื่องปะริกั๋ม เผ็ดหวานและฮ้อน มีแผวตังเหล้า สุรา
เจิญเอาปี้น้อง เผ่าพงษ์วงศา ปู่ป้าอาวอา ตี้นั่งตั้งเข้า
ม้าขี่ตังหลาย ตังหนุ่มตังเฒ่า ปากั๋นเต้นรำ ฮ่ำฮ้อง
มีจื่อต่างกั๋น เจ้าปี้เจ้าน้อง และเจ้าบ่าวหน้อย จ๋อมแปง
เจ้าบัวระเพ็ขร เจ้าแก้วหัวแสง เจ้าหลวงคำแดง ใจ๋แข็งตอบโต้
เจ้าข้อมือเหล็ก เต๊กไหนก่อโหว้ เจ้าหมอกมุงเมือง บ่มลี้
เจ้าศรีวิจัย เจ้าใจ๋เพ็ชรนี้ เจ้าต๋นใหญ่อี้ เนืองนอง
เจ้าดอกมะลิ งามบ่มีสอง เจ้าจี่บัวตอง กาบคำกาบแก้ว
เจ้ากันทะวงค์ รูบทรงแอ้วแหล้ว เจ้าจั๋นมันตา หัวแฮ้ง
เจ้าผาบใจ๋ดำ ลินคำลวดแล้ง เจ้าจั๋นฟ้องแป้ง ตั๋วลาย
ป้อเจ้าบ่าวหน้อย แช่มช้อยคิงผาย เจ้าป้อตับควาย เสื้อลายก่านป้อง
ม้าขี่ตังหลาย แต่งตั๋วนุ่งหย้อง เต้นฟ้อนกั๋นไป ม่วนล้ำ
มีสะล้อซึง ขึงปี่จ้วยก๊ำ สนุกจื่นสู้ ฮาเฮ
หมู่ขี้เหล้านั้น พ่องแป๋งต๋าเขว ลุกขึ้นปอเซ ไปต๋ำตั้งเข้า
บ่ได้ถือสา ว่าหนุ่มว่าเฒ่า อยู่กิ๋นกั๋นไป ปี้น้อง
ขอจบโวหาร ลาท่านเปื้อนป๊อง อย่าได้ขุ่นข้อง เคืองกำ
ค่าวระบำ นำมาเต้าอี้ เต้านี้วาดวางลง ก่อนแหล่นายเฮย......
ป้อมูล หลวงอ้าย
บ้านสันทรายป่าหนาด ต.มะขุนหวานอ.สันป่าตองจ.เชียงใหม่
