อี่ปู่สอนหลาน (ภาคที่ 24)

ใครกิ๋นหื้อหมั่นไป ใคร่ได้หื้อหมั่นเซาะหา
ใคร่ฮู้ใคร่จ๋า เข้าหาครูนักปราชญ์ผู้เฒ่า
หื้อจื่อจ๋ำกำดีเอา ไปสอนลูกเต้าและหลานต๋น
ก๋ารเป๋นคนเลย อย่าอยู่บ่ดายป๋างเปล่า

บ่อั้นก็จักเป๋น คาบเน่าห้อยฝาเฮือน
อย่าไปยับควายเหมือนจิบอกไฟเจือนเข้าบ้าน
อย่าไปจุล่ายต่าน จักเป๋นกั๋งวลและโศกไหม้
มักได้จ้างเสียของ อย่าไปขนข้าวของตอมจู๊

อย่าไปอวดอู้ ว่าตั๋วเป๋นดี
อย่าไปติเตี๋ยนเจียงจี ต๋นมีศีลในอาวาส
อย่าไปผะหมาด ยังก้าวเจ้าตังสาม
อย่าไปตัดหนาม ถมยังหนตางตั๋วเก่า

หื้อก่อยยำแยง ผู้แก่ผู้เฒ่า
เป๋นพ่อคนแม่คนแล้วเล้า อย่าคร้านยังก๋ารบ้านก๋ารเฮือน
รักเมียหื้อผูก รักลูกหื้อหมั่นถาง
เตียวตางหื้อมีเพื่อน เข้าป่าเข้าเถื่อนหื้อมีปื๋น

นอนเมื่อคืนหื้อ หมั่นไหว้พระเจ้า
ลุ๊กเจ๊าหื้อแล่นหาก๋าร คนต๋ำนานบ่ถ้าสอนถี่
เพิ่นตึงฮู้ตี้ อันจักเป๋นกุณ
ข้าวอยู่ยังนา ปล๋าอยู่ยังน้ำ

อย่าไปซ้ำผู้ผิด อย่าไปตัดสิทธิ์ปี้น้อง
สิ่งใดขัดข้อง หื้อเปิกษาหากั๋น

แหล่นายเหย...
"จินดาพรหม จินดาหลวง"
"ชมรมฟื้นฟูกวีล้านนาไทย"
"หอศิลปะมรดกกวีล้านนา"
9/9 หมู่ 6 บ้านแม่นาป้าก ต.แม่หอพระ
อ.แม่แตง จ.เชียงใหม่ 50150