อยู่อย่างไรให้มีสุขแบบเศรษฐกิจพอเพียงในสังคมยุคโลกาภิวัตน์

ยอหัตถา วันตานบน้อม ต่างดวงดอกส้อม ธูปไต้เตียนสี
แด่องค์พุทธะ ธรรมะเป๋นศรี สังฆะมุนี สีใสบ่เส้า
สร้างดวงปั๋ญญา นำมาเตื่อมเหง้า แก่ต๋นแห่งเฮา แม่นตั๊ด

เป๋นป๋าระมี มีผลเคร่งครัด บ่หมองหม่นฝ้า มัวมน
แก้วสามดวงนี้ มีคุณกุศล หล่อหลอมใจ๋คน หื้อใสเป่งแจ้ง
เป๋นบุญสมปาน เบ่งบานบ่แห้ง เหมือนแสงมณี จ้วยก๊ำ

บุญของคนไทย บ่ได้เหลื่อมล้ำ บ่ปุ๊ดขาดคว่ำ เปปัง
เฮามีเจ้าฟ้า ราจาตี้หวัง เป๋นเหมือนบุญบัง ป๊กปอห่อหุ้ม
สัปป๊ะภัยยา ตี้มาก่อตุ้ม ผ่อนหายคลายจุม มอดมิด




ธรรมาภิบาล องค์ท่านค้นคิด เศรษฐกิจด้าน เพียงพอ
หื้อมีสำนึก คุณธรรมหนอ อยู่อย่างเปียงปอ บ่หมองหม่นไหม้
ขยันอดทน ประหยัดไจ้ไจ้ แบบสังคมไทย ก่อนนี้

ภายในครอบครัว เป๋นตั๋วบ่งจี๊ อบอุ่นแวดต้อม เลางาม
เป๋นแบบอย่างไว้ สืบได้ตวยต๋าม ลูกหลานมีความ ทำดีถูกต้อง
ตึงก๋ารทำงาน บ่หาญเกี่ยวข้อง ต้องสิ่งปารา เถื่อนฮ้าย

ก๋ารอยู่ก๋ารกิ๋น เตียวดินย่างย้าย ก๋ารเกษตรด้าน อินทรีย์
ทำสวนผลไม้ บ่ได้ถอยหนี ปลอดสารเคมี มาควีแวดอ้อม
เลี้ยงไก่เลี้ยงหมู มาจูเตื่อมต้อม ปลูกผักครัวฮอม ขึ้นฮ้าน

ขุดบ่อเลี้ยงปล๋า ทำนาบ่คร้าน เสริมรายได้ด้าน ก๋ารเงิน
ทำบัญชีไว้ บ่ได้ขัดเขิน บ่หื้อจ่ายเกิน รายรับดั่งอั้น
อยู่อย่างพอเพียง จะได้เตี่ยงมั่น ต๋ามองค์ราชัน มอบไว้

วัตถุนิยม สังคมก๋ารไจ๊ บ่หันแก่ได้ เมามัว
อยู่ไปต๋ามน้ำ ทำไปต๋ามตั๋ว หลักของครอบครัว สานดีถี่ถ้อย
บ่มีคนใด ใจ๋ดำต่ำต้อย อยู่สามัคคี พร้อมพรัก

ทำบุญสุนตาน สานใจ๋ใฝ่ฮัก จักนำเตื่อมตุ้ม ลุมลา
ศีลสมาธิ เป๋นตี้อ่วงหา มีภูมิปั๋ญญา มาเป๋นตี้ตั้ง
เอาคุณธรรม นำมาเกิ๊ดกั้ง สั่งสมนาบุญ หนุนก๊ำ

เลิกโลภโกรธหลง ปล๋งวางขุ่นจ๊ำ ทำใจ๋โอบเอื้อ อารี
บ่ถือไพร่ฟ้า มหาเศรษฐี แล้วก่อจักมี ใจ๋นิ๋มเตี่ยงมั่น
จีวิตคนเฮา บ่อยู่ยาวหั้น หมั่นสมความดี เข้าไว้

ทรัพย์สินเงินทอง สัปป๊ะของไจ๊ ต๋ายแล้วบ่ได้ สักอัน
ทำดีเข้าไว้ ส่งได้เล็งหัน เป๋นผลตวยตัน คนลือเล่ากว้าง
ในยุคโลกา ภิวัฒน์เอกอ้าง อย่าได้หลงตาง ความคิด

อยู่หื้อเหมือนเขา ขอเฮาร่ำปิ๊จ อย่าคิดหยังหั้น เหมือนตวย
หื้อมีสำนึก ของงามของสวย ของเปิ้นคนรวย เปิ้นหาชื้อได้
เฮาอยากจะมี ผ่อตี้ถุงใต้ กระเป๋าเบาบาง อย่าซื้อ

อยู่อย่างเพียงพอ ขออย่าหย่องยื้อ เกิ๋นก่ำลังเจ้า ต๋นเอง
จะมีความสุข บ่ตุ๊กบ่เกร๋ง หื้อได้ป่ำเปง ต๋ามแนวป้อเจ้า
หมู่เฮาคนไทย บ่ได้โศกเศร้า ปฏิบัติเอา ต๋ามนี้

ในปี๋มงคล กุศลบ่งจี๊ แปดสิบปี๋เข้า มาเติง
ทำดีหื้อพร้อม น้อมถวายเถิง เป๋นบุญร่ำเปิง สูงส่งแก่กล้า
พระคือโกมคำ ส่องนำก้าวหน้า มีคุณพลา เลิศฤทธิ์

น้อมนำกุศล ผลบุญเตื่อมคิด เศรษฐกิจเจ้า องค์คำ
ค่าวระบำ นำมาเต้าอี้ เต้านี้วาดวางลง ก่อนแหล่นายเฮย...


รสสุคนธ์ รักษ์กวี
ชมรมอนุรักษ์ภาษาวัฒนธรรมล้านนาเชียงใหม่
๔๓ /๑ หมู่๗ ตำบลบ้านกลาง อำเภอสันป่าตอง จังหวัดเชียงใหม่ ๕๐๑๒๐
โทร ๐๕๓ -๘๓๔๒๔๗ --๐๘๖-๙๑๔๘๕๓๗

๑๙ มิถุนายน ๒๕๕๐